ਵਾਹ ਲੰਬੂ ਪੁੱਤ

ਅੱਜ ਪੋਤੇ ਦਾ ਜਨਰਲ ਨਾਲਿਜ਼ ਦਾ ਪੇਪਰ ਸੀ । ਪੋਤਾ ਬਹੁਤ ਖੁਸ਼ ਸੀ । ਘਰ ਪਹੁੰਚਦੇ ਹੀ ਦਾਦੇ ਨੇ ਗਲਵਕੜੀ ਚ ਲੈਂਦੇ ਹੋਏ ਪੁਛਿਆ
“ਕਿਹੋ ਜਿਹਾ ਰਿਹਾ ਮੇਰੇ ਲੰਬੂ ਪੁੱਤ ਦਾ ਪੇਪਰ…।?”ਦਾਦਾ ਜੀ ਨੇ ਆਪਣੀ ਆਦਤ ਅਨੁਸਾਰ ਪਿਆਰ ਨਾਲ ਪੁਛਿਆ
“ਵੱਡੇ ਪਾਪਾ ਤੁਸੀਂ ਦੱਸੋ ਸਭ ਤੋਂ ਵੱਡਾ ਕੌਣ ਹੈ ਤੇ ਇਸਨੂੰ ਬੰਦਾ ਅੱਲਗ ਅੱਲਗ ਨਾਵਾਂ ਨਾਲ ਪੁਕਾਰਦਾ ਹੈ ਤੇ ਮਹਿਸੂਸ ਕਰਦਾ ਹੈ……? ਪੋਤੇ ਨੇ ਦਾਦੇ ਨੂੰ ਪੁਛਿਆ
“ਸਭ ਤੋਂ ਵੱਡਾ ਰੱਬ ਹੈ ਜਿਸਨੂੰ ਬੰਦਾ ਪ੍ਰਮਾਤਮਾ,ਰੱਬ,ਭਗਵਾਨ,ਰਾਮ,ਕ੍ਰਿਸ਼ਨ ਅੱਲਾ,ਗਾੱਡ,ਦੇਵੀ ਦੇਵਤਿਆਂ ਨੂੰ ਅੱਲਗ ਅੱਲਗ ਨਾਵਾਂ ਨਾਲ ਮੰਨਦਾ ਹੈ ਪਰ ਇਹਨਾਂ ਸਭ ਦਾ ਇਕੋ ਹੀ ਰੂਪ ਹੈ ਤੇ ਕਈ ਇਸਨੂੰ ਅੱਖਾਂ ਬੰਦ ਕਰਕੇ ਮਹਿਸੂਸ ਕਰਦੇ ਨੇ ।”ਦਾਦਾ ਜੀ ਨੇ ਬੜੀ ਵਿਸਥਾਰ ਚ ਦੱਸਦੇ ਹੋਏ ਕਿਹਾ ।
“ਨਹੀਂ ਵੱਡੇ ਪਾਪਾ ਜੀ ਇਸਦਾ ਇਹ ਜਵਾਬ ਨਹੀਂ ਇਸਦਾ ਜਵਾਬ ਹੋਰ ਹੈ ।”
“ਕੀ ਹੈ ਪੁੱਤ ਇਸਦਾ ਜਵਾਬ……।?” ਦਾਦਾ ਜੀ ਨੇ ਬੜੀ ਉਤਸੁਕਤਾ ਤੇ ਹੈਰਾਨੀ ਨਾਲ ਪੁਛਿਆ ।
“ਦੁਨੀਆਂ ਚ ਸਭ ਤੋਂ ਵੱਡਾ ਪਿਆਰ ਹੈ ਜਿਸਨੂੰ ਆਪਾਂ ਪ੍ਰੇਮ,ਲਵ,ਪਿਆਰ ਅੱਲਗ ਅੱਲਗ ਭਸ਼ਾਵਾਂ ਚ ਅੱਲਗ ਅੱਲਗ ਨਾਵਾਂ ਨਾਲ ਪੁਕਾਰਦੇ ਹਾਂ ਪ੍ਰੇਮ ਹੋਵੇ ਤਾਂ ਬਿਗਾਨਿਆਂ ਨੂੰ ਵੀ ਵਸ ਚ ਕਰ ਲੈਂਦਾ ਹੈ,ਪ੍ਰੇਮ ਨਾ ਹੋਵੇ ਤਾਂ ਆਪਣੇ ਵੀ ਬਿਗਾਨੇ ਹੋ ਜਾਂਦੇ ਨੇ,ਇਸ ਨੂੰ ਹਰ ਇਨਸਾਨ,ਜਾਨਵਰ,ਪੰਛੀ,ਕੀੜੇ,ਮਕੌੜੇ,ਜੀਵ ਜੰਤੂ ਮਹਿਸੂਸ ਕਰਦੇ ਨੇ ਚਾਹੇ ਹਜ਼ਾਰਾਂ ਮੀਲ ਦੂਰ ਬੈਠੇ ਹੋਣ,ਸਗੋਂ ਜਿਉਂ ਜਿਉਂ ਦੂਰੀ ਵੱਧਦੀ ਹੈ ਪ੍ਰੇਮ ਵੱਧਦਾ ਹੈ । ਪਿਆਰ ਚ ਕੋਈ ਪਿਆਰਾ ਲੱਗੇ ਤਾਂ ਉਸਨੂੰ ਮਿਲਣਾ ਜਰੂਰੀ ਨਹੀਂ,ਉਸਦਾ ਖਿਆਲ ਹੀ ਆ ਜਾਣਾ ਮਹਿਸੂਸ ਕਰਨਾ ਹੀ ਪੂਰਤੀ ਹੈ, ਪ੍ਰੇਮ ਨੂੰ ਹਰ ਕੋਈ ਪਸੰਦ ਕਰਦਾ ਹੈ । ਇਹ ਪ੍ਰੇਮ ਤਾਂ ਰੱਬ ਨੂੰ ਵੀ ਵਸ ਚ ਕਰ ਲੈਂਦਾ ਹੈ ।”ਪੋਤੇ ਨੇ ਦਾਦੇ ਨੂੰ ਵਿਸਥਾਰ ਚ ਦਸਿਆ ਤਾਂ ਦਾਦੇ ਨੇ ਪੋਤੇ ਨੂੰ ਘੁੱਟ ਕੇ ਗਲ ਨਾਲ ਲਾਅ ਲਿਆ ਤੇ ਅੱਖਾਂ ਚੋਂ ਹੰਝੂ ਨਿਕਲ ਆਏ ਤੇ ਬੋਲੇ
“ਪੁੱਤ ਤੂੰ ਮੈਨੂੰ ਅੱਜ ਬਹੁਤ ਵੱਡੀ ਗੱਲ ਦੱਸੀ ਹੈ ਮੈਂ ਸਾਰੀ ਉਮਰ ਕੱਢ ਦਿੱਤੀ ।”ਪੋਤੇ ਦਾ ਸਿਰ ਪਲੋਸਦੇ ਹੋਏ ਕਿਹਾ
“ਵੱਡੇ ਪਾਪਾ ਇਹ ਗੱਲ ਮੈਂ ਤੁਹਾਡੇ ਕੋਲੋਂ ਹੀ ਸਿੱਖੀ,ਤੁਸੀਂ ਸਾਨੂੰ ਕਿੰਨਾ ਪਿਆਰ ਕਰਦੇ ਹੋ,ਮੈਂ ਤਾਂ ਕਦੇ ਰੱਬ ਵੇਖਿਆ ਨਹੀਂ ਮੈਂ ਤਾਂ ਹਮੇਸ਼ਾਂ ਤੁਹਾਡਾ ਪਿਆਰ ਵੇਖਿਆ,ਮਹਿਸੂਸ ਕੀਤਾ,ਬਸ ਅੱਜ ਇਹੀ ਲਿਖ ਕੇ ਆਇਆਂ ਹਾਂ,ਠੀਕ ਆ ਨਾ ਵੱਡੇ ਪਾਪਾ ਜੀ…।?”ਦਾਦੇ ਨੇ ਪੋਤੇ ਨੂੰ ਗੱਲ ਲਾਅ ਲਿਆ ਤੇ ਮੂੰਹੋਂ ਨਿਕਲਿਆ “ਵਾਹ ਮੇਰੇ ਲੰਬੂ ਪੁੱਤ” ਤੂੰ ਲੰਬਾ ਹੀ ਨਹੀਂ ਸਿਆਣਾ ਵੀ ਹੋ ਗਿਆ ਬਹੁਤ ਸਿਆਣਾ ਜਿਸਨੇ ਆਪਣੇ ਦਾਦੇ ਨੂੰ ਪ੍ਰੇਮ ਸਿਖਿਆ ਦਿੱਤੀ ।”
****